Аркадий Бабченколысь виӧмсӧ вӧчсьӧдӧмкӧд йитӧдын нуӧдсьӧ вензьӧм. Мыйла колӧ вӧлі первой кувны лёк киллерлӧн пуля улын, а сэсся ловзьыны? Гашкӧ и колӧ вӧлі, но нелючкиыс уна.
Ме ог тӧд став чирторсӧ тайӧ дзуг делоыслысь. Вермас лоны, мый ме ог ло прав. Но век жӧ вӧзъя ассьым версияӧс.
Ме чайта, мый некод вины Бабченкоӧс эз кӧсйы. Некодлы сійӧ оз ков, ни Путинлы, ни ФСБ-лы. Вывті ёна пӧльтӧны тайӧ мыгӧрсӧ, быгъя моль моз. Номсьыс вӧчӧны слӧнӧс. Ачыс Бабченко вывтіасьысь морт. коді вӧтлысьӧ донтӧм пиар бӧрся. Корсюрӧ чайтсьӧ, эз-ӧ сійӧс мӧдӧдны Украинаӧ, медым конъявліс тайӧ канансӧ? Бабченко асьсӧ нимӧдӧ оппозиционерӧн, но кутӧ асьсӧ сідзи, вӧчӧ сэтшӧм заявоениеяс. кодъяс отсалӧны Россиын авторитарнӧй режимлы. Вильнюсын бызгис, бур пӧ лоӧ, Россия местаын кӧ лоас дас удельнӧй княжество, кодъяс кутасны воюйтны ӧта-мӧдыскӧд. Лючки оппозиционер татшӧмсӧ шуны оз вермы. Сӧмын провокатор. Сэсся шуасьӧ, 86 процент йӧзыс пӧ, кодъяс режим дор быдло. Омӧльтӧ войтырсӧ оппозиция нимсянь, да сідзи, медым Путинлӧн режимлы вӧлі кивыв.
Ме ог радейт конспирологическӧй теорияяс. но век жӧ чайта, мый Россияса власть вермис тані пуктыны ассьыс пайсӧ.
И медтӧдчанаторйыс со мыйын. Позьӧ Украинаса безопасность службаӧс дивитны. видны «спектакльсьыс», и сӧглас накӧд. коді эскӧдӧ, мый украинскӧй власть ворссис, сылы оз кутны эскыны, тайӧ лои Кремльлӧн да ФСБ-лӧн ыджыд пропагандистскӧй вермӧгӧн, но век жӧ СБУ петкӧдліс, мый сійӧ йӧз дорӧ бурджыка относитчӧ, чем ФСБ. Методъясыс, уджалан ногыс разнӧйджыкӧсь. Кӧть сэні и тані Дзержинскӧйлӧн «быдтасъяс». ФСБ жаль тӧдтӧгджык, вирысь повтӧг, хищник моз. Казьтывны кӧ керкаяс взорвитӧмсӧ 1999-2000 воясӧ Москваын да Волгодонскын, а сідзжӧ Рязаньын «велӧдчӧм». СбУ сы серти челядь, детсад. Бабченколӧн делӧас ни ӧти вир войт эз киссьы. Медся ыджыд лёкыс – йӧзлӧн майшасьӧм.
Гашкӧ ме и сорасся, но эм татшӧм версия. ФСБ медаліс Киевын мортӧс, медым быттьӧ вины Бабченкоӧс. Аддзӧны киллерӧс. Но киллерсӧ ФСБ-са гусьӧн сетӧ СБУ-лы, юӧр визувтӧм ногӧн. Лӧсьӧдӧ ситуация, медым вӧлі лӧсьӧдӧма спецоперация, код серти Бабченко первойсӧ кувсьӧ, а сэсся ловзьӧ. Артмӧ цирк сяма.
Кутшӧм могысь тайӧ? Могыс ӧти – скомпрометируйтны Украинаӧс став мирса водзын, мыдым позис шуасьны, сылы эскыны оз позь.
Тайӧ Кремльлӧн, Путинлӧн да российскӧй милитаризмлӧн ыджыд артмӧг. Аски позяс вӧчны збыль теракт, а кор Украина кутас дорйысьны, вомавны: сылы эскыны оз позь.
Тайӧ спецоперациясӧ позьӧ кӧ лыддьыны Украиналӧн вермӧгӧн, то сӧмын тактическӧйӧн, жеб подулаӧн да кад кежлӧ. А стратегическӧй сюрӧс боксянь вермас помасьны ворссьӧмӧн.
Вермас лоны, мый футбол чемпионат бӧрас Путинлӧн Россия сюртчас выль военнӧй авантюраӧ. Вермас восьсӧн уськӧдчыны Украина вылӧ. Та вӧсна и пансьӧны провокацияяс. Кодлӧн главнӧй могыс – уськӧдны Украина дорӧ эскӧм. Асьныс украинецъяс, торйӧн кӧ, СБУ-шникъяс сетӧны та вылӧ помка. Тайӧ зэв шуштӧм символ. Оз позь сетчыны провокацияяслы.
