Болгариялӧн асшӧрлун шедӧдӧмсянь 140 во тырӧм пасйӧмкӧд йитӧдын сэтчӧ ветліс РПЦ-са веськӧдлысь Гундяев. Мероприятие вылас пансис вензьӧм президент Румен Радевкӧд, коді шуис, мый Болгарияӧс мездісны уна сикас войтыр, тшӧтш и румынъяс, украинецъяс, белоруссъяс, полякъяс,финнъясӧс, литовецъяс да сідз водзӧ.Колӧ тӧдчӧдны, мый Радевлӧн репутацияыс Россия дор политиклӧн. Но весиг сы вылӧ Россияса главнӧй поп уськӧдчис: тайӧ Россия пӧ мездіс Болгарияӧс, а эз Польша да Литва.
Яндысьтӧмлуныс главпоплӧн шензьӧдӧ. Тадзи сійӧ омӧльтӧ, пыдди оз пукты разнӧй национальностя йӧзсӧ. Кыдз тӧдса 1878-ӧд воын эз вӧвны асшӧрлунаӧн ни Польша, ни Литва, ни Украина, ни Финляндия. Найӧс вынӧн кутіс да нартитіс Российскӧй империя. Мыйта украинец, финн, белорус тышкасис сэки Османскӧй империялы паныд. Мыйта морт сетіс ассьыс олӧмсӧ. Иньтернетысь лыдди ӧти мортлысь висьтасьӧм, кодлӧн прадедыс, национальность серти немец муніс турокъяскӧд война вылӧ да петкӧдліс збойлун, сійӧс пасйӧма уна наградаӧн, А Гундяев серти артмӧ, мый куш рочьяс тышкасисны. Мый лоӧ историческӧй збыльтор торкӧмӧн, фальсификацияӧн.
Нинӧм чуймынысӧ, мый Россияӧс некод оз радейт мирас,весиг матысса кывъя войтыръяс. Сы вӧсна, мый сійӧ вывтіасьӧ, асьсӧ медвылӧ пуктӧ, а мукӧдӧс кедзовтӧ. Сыысь полӧны, зільӧны дорйысьны, санкцияяс пыртӧны.
Российскӧй империя мездіс Болгарияӧс эз сы ради, медым мездыны, а сы могысь, медым геополитическӧя паськӧдчыны, вӧчны тайӧ выль мусӧ империялӧн юкӧнӧн. Шымыртны-босьтны дзоньнас Балканскӧй кӧджсӧ. Кыдзи век вӧчліс. Мыйта войтырӧс суис неминуча, кодъясӧс Московия первой «мездіс", а сэсся немӧ вайӧдіс, бырӧдіс. Мыйта национальнӧй котырлысь мырддис мусӧ. Но Болгариякӧд эз артмы фокусыс. Сійӧ зэв ӧдйӧ ӧтдортчис Россияысь да лӧсьӧдіс топыд йитӧд Германиякӧд да Австро-Венгриякӧд.
А удайтчис кӧ эськӧ самодержавиелы асбордавны Болгариясӧ? Пытны сійӧс империя пытшкӧ? Сэки болгараӧс эськӧ суис став шуштӧмторйыс, кодъяскӧд паныдасьлісны шуам, полякъяс, украинецъяс да мукӧд. Сэки эськӧ тыр ӧдӧн нуӧдсис болгара пӧвстын русификация политика, налысь аслыслунсӧ, кывсӧ бырӧдалісны, кыдзи бырӧдісны уна мукӧд войтырлысь. Сэки болгаралӧн видзӧдласыс Россия дорӧ тӧдчымӧн эськӧ вежсис лёклань. Сэки нинӧм эз коль мӧдтор, кыдзи лӧгавны империя вылӧ, кыдзи ӧні лӧгалӧны Украина, Прибалтика, Грузия да мукӧд вӧвлӧм «ичӧтджык вок".
Болгара бура видзӧдӧны Россия вылӧ буретш сӧмын сы вӧсна, мый найӧ эз веськавлыны да эз овны российскӧй «райын». Эз вескавлыны чорыд гыж улас. Веськавлісны кӧ, сэки эськӧ тайӧ нацияыслы Россия лоис лёкысь-лёк вӧрӧгӧн. Турокъяс улын олісны 500 во, но кывсӧ эз воштыны. А Россия улын кӧ 500 во?! Кывйыс эськӧ ёна слабмис, а гашкӧ и вошис. Юавсьӧ, коді лёкджык.
