Сідз шусяна президентскӧй бӧрйысьӧмын кандидатъяслӧн овлӧны довереннӧй лицояс, комиӧн кӧ, чужӧмбанъяс.
Путинлӧн штабын сэтшӧм-татшӧм чужӧмбанӧн лоис миян республикаын бура тӧдса Мария Кузьбожева. Тайӧ шензьӧдана лоӧмтор. Ог гӧгӧрво, мыйла Мария Вячеславовналы колӧ сувтны морт дорыс, коді 18 во чӧжӧн вӧчис сы мында лёктор, мый ставсӧ артавны кыкнан кисьыд чуньяс оз тырмыны? Тшӧтш и комияслы лёксӧ вӧчис Путин.
Торйӧн нин дивӧ, мый 2011-ӧд вося декабрын митинг вылын Кузьбожева горзіс: «Путин, мун татысь!». СМИ та йылысь паськыда юӧртіс. А ӧні Кузьбожева друг лоис сылӧн дӧвереннӧйӧн сылӧн, кодӧс коркӧ этш воштӧмӧн пиняліс-видіс. Пыравліс и демократическӧй движениеясӧ кыдз возмӧстчысьясысь ӧти. Кыдзи татшӧм вежсьӧм-метаморфоза бӧрас мортсӧ донъявны? Комияс татшӧмъяссӧ шулӧны гуга бана шаньгаясӧн, тайӧ кывйыс гӧгӧрвосьӧ кыдз перевертыш, лицемер, беспринципнӧй морт. Тайӧ приспособленчество, слӧймӧдчӧм. Кутӧ нырсӧ тӧвныр кузя. Сэки эз сибӧдны вождьлӧн мыгӧр дорӧ да та понда пинясис, а ӧні матыстісны.
Со татшӧм гуга бана шаньганас лоис Мария Кузьбожева. Кутшӧм ыджыд помка тойыштіс сійӧс туйтӧм воськов вылас? Гашкӧ сійӧ чайтӧ, мый Путин кольӧм квайт вонас вежсис бурланьӧ? Эз. Сӧмын унджык лёксӧ вайис, и россияналы, кодъясӧс дзескӧдӧ, и экономикалы, кор оласног жебмӧ, и ортсыса кананъяслы, торйӧн кӧ, украиналы да Сириялы, кӧні Путинлӧн некытчӧ шогмытӧм политика понда киссьӧ вир. Лёксӧ вайис Путин и комияслы, босьтчис бырӧдны коми кыв. Мыйла та бӧрын колӧ лоны сылӧн довереннӧй чужӧмбанӧн?! Тайӧ юр яндзим.
Татшӧм йӧзыслы, кыдзи Кузьбожева эскыны ӧні оз позь. Сійӧ воштіс довериесӧ, эскан помкасӧ. Тӧдӧмысь став воськовсӧ вӧчӧ карьера ради. Буретш йӧзыс, кодъяс нюлӧны коклябӧрсӧ, бӧрыннас медпервойяс лыдын и вузалӧны кӧзяинсӧ.
Бурджык нин Валерий Марков. Сійӧ бурджык кӧть нин сійӧн, мый оз шыблась ӧтарӧ-мӧдарӧ, кӧть и век сулаліс власть дор.
