Межрегиональный интернет-журнал «7x7» Новости, мнения, блоги
  1. Республика Коми
  2. Путинлӧн химтерроризм

Путинлӧн химтерроризм

Василий Сажин
Василий Сажин
Добавить блогера в избранное
Это личный блог. Текст мог быть написан в интересах автора или сторонних лиц. Редакция 7x7 не причастна к его созданию и может не разделять мнение автора. Регистрация блогов на 7x7 открыта для авторов различных взглядов.
Поделитесь с вашими знакомыми в России. Открывается без VPN

Лондонын вӧлі отравитӧма Россияса спецслужбаын вӧвлӧм сотрудник Сергей Скрипальӧс. Чайта, тані некутшӧм сумлевайтчӧм оз вермы лоны, коді сулалӧ тайӧ мый саяс. Мыжа Россияса власть, кӧні ыджыдалӧ чекистъяслӧн нырвизь.

Путин шуліс, эмӧсь вӧрӧгъяс, а эмӧсь вузалысьяс, предательяс, вӧрӧгъяскӧд ме сямма сёрнитчыны, а предателькӧд некор ог. Тані петкӧдчӧны сылӧн комплексъяс. Кыдзи вӧлі виӧма Александр Литвинекоӧс, либӧ кыдзи Денис Вороненковӧс, а Катарын взорвитӧма Зелимхан Яндарбиевӧс.  Тані ясыда тыдалӧ ЧК-лӧн коктуйыс. Пропаганда век соссьӧ, эг пӧ ме. Век соссьыліс, и кор кватитлісны Крым. и кор уськӧдлісны Малайзияса Боинг, и кор Сирияын веськавлісны американецъяслӧн бомбаыс улӧ, и кор виалӧны суйӧр сайӧ пышйысьясӧс.

Власть кыв вылас соссьӧ, а збыль вылас подулалӧ ассьыс мыжсӧ, вӧчӧ сэтшӧм чужӧм, коді висьталӧ: тайӧ ме отравиті. Телеканалса пропагандистъяс весиг оз дзебны: миян киясным зэв кузьӧсь: быдӧн дорӧ судзӧдчам. Кодкӧ шуасьӧ, Скрипальӧс вӧлі помилуйтӧма, лэдзӧма тюрьмаысь и нинӧмла пӧ та бӧрын водзӧссӧ перйыны. Абу сӧглас. Авторитарнӧй путинскӧй режим кӧсйӧ петкӧдлыны вынсӧ.

Путин тадзи повзьӧдлӧ найӧс, кодъяс дасьӧсь пышйыны. Надейтчӧ, мый сэсся некод оз эновт Россиятӧ. Весьшӧрӧ. Пышъялысьяс лоасны. Туйтӧм политика да власть оз сет мӧд петан туй. СССР-ын шпионъяс дорӧ, кодъяс вузавлісны Айму, сетлісны суйӧрсайса разведкалы канан гусятор, примитлісны смертнӧй казнь приговоръяс.  Но пышъялысь лыдыс эз чин, а содіс. Ӧнія серпасыс ӧдвакӧ тӧдчымӧн вежсяс.

Преступлениеас тыдавсьӧ и личнӧй помка. Путин чекист, и отравитӧм йӧзыс сідзжӧ чекистъяс, кӧть и вӧвлӧм.

Британияса премьер-министр Тереза Мей – слаб нырщик. Оз позь татшӧмыслы веськӧдлыны правительствонас. Колӧ сэтшӧм нырщик кыдзи Маргарет Тетчер либӧ Черчилль..

Мей зэв слаба вочавидзис лоӧмтор вылас. Колӧ вӧлі оз куш ыстыны 23 дипломатӧс, а орӧдны дипломатическӧй йитӧдъяс, киритны футбол кузя мирса чемпионатын участвуйтӧмсӧ, мырддьыны путинскӧй империялысь нуӧдан правосӧ да с. в. Некытчӧ шогмытӧм реакцияыс и Европаса политикъяслӧн, колӧ пӧ сёрнитчыны Россиякӧд. Кыдзи нӧ позьӧ тадзисӧ?! Ӧд сійӧ, мый вӧчис Путинлӧн режим – шусьӧ терроризм. Весиг Гитлер Мӧд мирӧвӧй войнаын эз применитлы химическӧй оружие. А Путин применитіс. Сідзкӧ сійӧ нӧшта лёкджык. Сылӧн  режимыс – террористическӧй. Кӧть кыдзи, а тайӧ буретш тадзи. Оз позь сылы сетчыны. Сійӧ вельмас, ышмас да аски нӧшта унджык лёктор вӧчас, унджык вир кисьтас.

Россияса матькысь МИД яндзимсӧ воштіс. Дипломатъяссӧ Британияысь ыстӧм вылӧ вочавиидзисны серамӧн; минус 23 пӧ. Сэк, кор сёрни мунӧ йӧзлӧн шог йылысь. Некымын морт кувсян выйын.

Ӧткымын эксперт шуасьӧ, Россиялы пӧ абу кивыв тайӧ отравлениеыс, сы вӧсна мый уськӧдӧ  страналысь репутациясӧ, бур нимсӧ. Тайӧ тадзи, но юавсьӧ, а колӧ-ӧ  путинскӧй режимлы репутация? Сійӧ кутӧ асьсӧ кыдз уличавывса шпана, кампужитчысь джентльменъяс водзын. Джентльменъяс пӧвстын кӧ хулиганлӧн эм репутация, то тайӧ хулиганлы ыджыд минус, бала чинтӧм сяма. Кымын ыджыдджык пакӧсть вӧчас шпана, сымын сылӧн шпанаяс пӧвстын авторитетыс вылынджык.

Джентльменъяс пӧвстын олігӧн эмавсьӧ ӧти закон, бандитъяс пӧвстын пыдди пуктыссьӧ дзик мӧд закон, код серти медвылыс тшупӧдын сійӧ, коді медся скӧр да жаль тӧдтӧм.

Путинскӧй Россия некутшӧм сэтшӧм репутация вӧсна оз тӧждысь. Ставыс ӧткодь, ӧти тшупӧдӧн улынджык, ӧти тшупӧдӧн вылынджык, – веськодь. Сылы колӧ сӧмын ӧтитор: медым сыссь поліс став мирыс. Медым ставыс мушар пасьталаын тіралісны сылысь нимсӧ казьтылігӧн.

А репутациясӧ воштас Россия, российскӧй народ. Найӧ ворссясны. А веськӧдлан режимыс, властьыс вермасны, шедӧдасны водзӧс. Тайӧ зыкыс кыпӧдӧ Путинлысь рейтингсӧ, скӧрмӧм йӧз пӧвстын пыдди пуктӧмсӧ, ёнмӧдӧ позянлунсӧ бӧрйысян кампанияын. Тыдалӧ буретш та вӧсна и ГРУ-са вӧвлӧм офицер Сергей Скрипальӧс отравитісны бӧрйысян лун водзын, кор неуна колис тайӧ паса кадколастӧдзыс. Сэк жӧ и Путин лыддис ассьыс ядернӧй послание, коні грӧзитчис став мирсӧ пӧртны радиоактивнӧй бусӧ.

Кымын ёсьджык зыкыс тайӧ делӧ гӧгӧрыс, сымын ыджыдджык рейтинг Путинлӧн. Мед. Но аски лоӧ лёкджык. Кремльлӧн тактическӧй вермӧм, но стратегическӧй ворссьӧм.

Посланиеыс вермас лоны блефӧн, вермас лоны, мый некутшӧм чудо-оружие абу, а тайӧ ВПК-са зільысьяс ылӧдчӧны, медым власть содтіс оборона вылӧ рӧскодъяс: эм кӧ зэв ыджыд вермӧм, то и сьӧмсӧ нинӧм жалитны. А со Скрипальӧс пикӧ вайӧдісны ньӧти ворсӧдчытӧг.

Но Россиялы медым бӧр чӧжны, восстановитны бур репутациясӧ, ковмас бӧрыннас мынтысьны, медвойдӧр  политическӧй воськовъясӧн, ковмас веськӧдны лёк вӧчӧмыслысь помшуӧмсӧ. Та дырйи лоӧ уна воштӧм. Син водзын СССР-лӧн пример, кодлы бӧръя воясас медым шедӧдны мирӧвӧй сообщество водзын авторитет, ковмис вежсьыны, нуӧдны ыджыд реформаяс, унаторйӧн вештысьны. Сэтчӧдз, мый сійӧ киссис. Киссьӧмыс – тайӧ дон, кодӧс ковмис мынтыны, медым СССР местаын лӧсьӧдны лючки общество.Уналаын тайӧ артмис либӧ артман выйын, а Россияывн да кӧнсюрӧ некыдз оз артмы.

Кананлӧн мирас лёк репутация – тайӧ ыджыд падмӧг, ыджыд минус. Водз ли сёр, таысь лоӧ пуктӧма тшӧт. Ӧні Путин коддьӧмъяслы позьӧ ышнясьны да баквалитчыны, но воас кад да ковмас вештысьны тшӧт серти. Россиялы ӧні некод оз эскы.

А тӧрыт Путин дзикӧдз йӧймис. Висьталіс, Норд-Остын террористъяс кӧсйисны пӧ нуны заложникъяссӧ Гӧрд площадь вылӧ да сэні лыйлыны. Татшӧмторсӧ вермас крапнитны сӧмын абу тыр сюсь. Россияӧн веськӧдлӧ вежӧрсӧ воштӧм морт, кодӧс мортнас шуны оз позь. Весиг Басаев 1995-ӧдын Буденновск бӧрас нуис заложникъяссӧ Чечняӧ да лэдзис асмезд вылӧ.

Россиялы, медым лоны лючки кананӧн, бӧрыннас ковмас быть нуӧдны пытшкӧсса да ортсыса политикаын вежсьӧмъяс. Ыджыд дон мынтӧ тшӧт весьтӧ. Тайӧ быть лоас, но сӧмын Путин бӧрын.

 

Материалы по теме
Мнение
15 мая
Игорь Аверкиев
Игорь Аверкиев
Благополучатели Путинской войны и «заградотряды» на пути ее прекращения
Мнение
23 января
Юрий Топотов
Юрий Топотов
Что чувствует незрячий человек в городе
Комментарии (0)
Мы решили временно отключить возможность комментариев на нашем сайте.
Стать блогером
Новое в блогах
Рубрики по теме