Межрегиональный интернет-журнал «7x7» Новости, мнения, блоги
  1. Республика Коми
  2. Бӧрйысьӧм кыдз ритуал

Бӧрйысьӧм кыдз ритуал

Василий Сажин
Василий Сажин
Добавить блогера в избранное
Это личный блог. Текст мог быть написан в интересах автора или сторонних лиц. Редакция 7x7 не причастна к его созданию и может не разделять мнение автора. Регистрация блогов на 7x7 открыта для авторов различных взглядов.
Поделитесь с вашими знакомыми в России. Открывается без VPN

Кремль сетіс индӧд регионъясса властьлы вӧчны матысмысь президентскӧй бӧрйысьӧмсӧ праздникӧн. Котыртны пӧ быдлаын гажӧдчан мероприятиеяс, быдсяма конкурсъяс да фестивальяс.

Помнитсьӧ, сӧвет власть кадӧ тадзи жӧ кымын и вӧчлісны. Бӧрйысян лунӧ участокъясас вайлісны вузалӧм вылӧ дефицита тӧваръяс да вӧлӧга. Збыльысь праздник.

Но ме гижлі нин, мый сэки бӧрйысьӧм вӧлі ритуалӧн. А путинскӧй Россияын бӧрйысьӧм – тайӧ спецоперация. Но и  ӧні, тайӧ пӧрйӧ кӧсйӧны сідзжӧ пӧртны ритуалӧ. Гажӧдчан мероприятиеяссӧ кӧ тӧд вылӧ босьтны. Спецоперация вылӧ колӧ вын, сы вылӧ рӧскодуйтчӧ эбӧс, а ритуал вылӧ вынйӧр оз ков. Таын и помкаыс. Кремльлы кивыв буретш мед кампанияыс нуӧдсис мода вылас, некутшӧм тӧдчанатортӧг, кыдз шуласны, рутиннӧя. Сідзи, мед Путинысь кындзи став мукӧд кандидатыс быттьӧ солдатъяс стройын моз сулалісны да вӧчисны сідзи, кыдзи тшӧктӧ командир, Кремльса кӧзяин.

Россияын бӧрйысян участокъясын некор нинӧм эз решайтчывлы. Ставыс вӧчсьыліс мӧдлаын, вынйӧр тшупӧдын. Но колӧ-ӧ бойкотируйтны бӧрйысьӧмсӧ? Кодсюрӧ вӧзйӧ бойкот. Ветлан кӧ пӧ гӧлӧсуйтны, тайӧн легитимизируйтан авторитарнӧй режимсӧ. Гашкӧ и тадзи, но… Тайӧ абу бур петан туй. А сийӧ, мый олан путинскӧй империяын, вӧдитчам шайтъясӧн, мынтам налог, – тайӧ абу легитимизация!?

Бойкотыс водзӧстӧм. Ӧти-кӧ, сійӧс некод оз казяв. Властьыс сідз ли тадз вӧчас колана мында процентсӧ. Оз кӧ честнӧя, то фальсификация отсӧгӧн. Бойкотыс сетӧ водзӧссӧ сӧмын демократияа кананъясын, кӧні оппозициялӧн сы мында жӧ позянлун влияйтны йӧзлӧн видзӧдлас вылӧ, кыдзи и правительстволӧн. Сідзкӧ бойкотыс торксяс, немӧ воас. Сійӧ лоӧ весьшӧрӧ.

Мӧд-кӧ, бойкот – тайӧ асйӧршитчӧм да позьӧ кӧ тадзи шуны политическӧй сектантство. Ӧтдортӧ йӧзсӧ режимлы водзсасьӧмысь, кӧдзӧдӧ налысь водзмӧстчӧмсӧ, маргинализируйтӧ. Весиг Ленин татшӧм уджас петкӧдліс асьсӧ сюсьджыкӧн. Казьтывны кӧ сылысь ликвтдаторъяс да отзовистъяс кузя статьяяссӧ.

Та вӧсна лыддя ковтӧмӧн бойкотсӧ. Кӧть нин сы могысь, мый моральнӧй правоыс петны фальсификациялы панад митинг вылӧ эм сӧмын сылӧн, коді ветліс гӧсӧсуйтан участок вылӧ. Коді эз ветлы, моральнӧй инӧдсӧ воштӧ.

Ме лыддя, мый оз ков дивитны кандидатъясӧс, кодъяс сюртчисны бӧрйысян кампанияӧ. Абу сӧглас, мый дивитны колӧ шуам Явлинскийӧс. Мед кӧть ӧти процент лоӧ, но и тайӧ кыдз шуласны нянь. Збыль вылас сылӧн ыджыдджык рейтингыс, а ичӧт сы вӧсна, мый режимыс дзескӧдӧ оппозиционеръясӧс, йӧз вежӧрӧ тувъялӧ мӧвп, мый быттьӧ найӧ ставныс Айму вузалысьяс да туйтӧмъяс. Та понда и чинӧ рейтингыс.

А Путинлӧн збыль вылас рейтингыс 5 – 10, гашкӧ 15 процент. А став мукӧд йӧзӧдӧм лыдпасыслӧн подулыс – войтырӧс ылӧдлӧмын да повзьӧдлӧмын. Россияна пӧвстын фобияяс да страк пестӧмӧн, да нӧшта юр вемсӧ пропагандаӧн пожъялӧмӧн.

Петан туйыс сӧмын ӧти: бӧрйысьӧмсӧ оз позь лыддьыны бӧрйысьӧмӧн. Тайӧ тешитчӧм да профанация. Колӧ тышкасьны пеж режимыслы паныд. Оппозиционерӧн колӧ нимтны сӧмын сійӧ кандадатъясӧс да политикъясӧс, кодъяс оз шуны кампаниясӧ законлы лӧсяланаӧн, оз пуктыны сійӧ збыльвыв, мӧд ногӧн кӧ, оз признайтны. Оз шуны найӧс легитимнӧйӧн. Буретш тайӧ петкӧдчан пас, коді торйӧдас, коді эм коді. Сійӧ, коді сӧгласитчас сідз шусяна бӧрйысьӧмлӧн помшуӧмкӧд – сійӧ абу оппозиционар, а режимлы копрасьыс, сылы восьсӧн либӧ гусьӧн служитысь, коклябӧр нюлысь.

Тайӧ бӧрйысьӧмыс – абу збыль, а суклясяна!

Материалы по теме
Мнение
24 декабря 2023
Андрей Брой
Андрей Брой
Рабочие люди должны жить достойно и уметь защищать свои права
Мнение
2 марта
Сергей Илюхин
Сергей Илюхин
Состоялось итоговое заседание суда в Архангельске о признании недействующей территориальной схемы обращения с отходами
Комментарии (0)
Мы решили временно отключить возможность комментариев на нашем сайте.
Стать блогером
Новое в блогах
Рубрики по теме