Пӧшти дас во сайын менам пошта ящикӧ кутісны вайны "Фома" журнал, РПЦ-лысь издание. Глянцевӧй, мичаа дзирдалысь. Чуйми. Ме сійӧс ог судзӧд, оз лӧсяв видзӧдласлы. Почтамтын висьталісны, Усинсксянь пӧ анонимнӧя гижӧдӧмаӧсь. Дивӧ. Менам сэні рӧдвуж ни тӧдса абу. Ясыд, Сыктывкарсянь. Гӧгӧрвои, коді, мыйся морт тадзи ворсӧдчӧ. Партизан-подпольщик моз висьтасьтӧг мӧдӧдӧ.
Тайӧ журналлӧн могыс, кыдзи гӧгӧрвои, ышӧдны-кыскыны йӧзсӧ религияӧ. Дум вылӧ усис Ильф-Петровлӧн "Зарни кукань" романысь юкӧн, коні ксендзъяс енлы эскысьӧ портісны Адам Козлевичӧс. Рочӧн кӧ шуны, охмуритісны. Татшӧм сяма охмурежсӧ кодсюрӧ кӧсйӧ мекӧд вӧчны.
"Фомасӧ" мырдӧн сорӧн козьналӧмыс да нӧшта и кор тайӧ вӧчсьӧ помся, дугдывтӧг, позьӧ шуны бомбитӧны пошта ящикӧс, - тайӧ менӧ дӧзмӧдӧ, моральнӧя дойдӧ. Быттьӧ ме кутшӧмкӧ подопытнӧй кролик. Кор пожъявны кӧсйӧны юр вемӧс, тувъявны выль видзӧдас-эскӧм, -- тайӧ увтыртӧ менсьым чувствоясӧс. Енлы ыскысьлысь либӧ не эскысьлысь, ӧткодь. Костыс абу ыджыд. Код тӧдас, гашкӧ ме атеист, гашкӧ мормон, гашкӧ Ийегова йылысь висьтасьысь-свидетельствуйтысь (кодӧс запретитӧма Россияын лыддя закон торкалӧмӧн), гашкӧ Макарон Монстр вичкоса адепт, гашкӧ..? Водзті, 1990-ӧд воясӧ тӧдса вӧлі унакӧд, ветлывлі разнӧй собраниеяс вылӧ, но пыравлі, вӧлі членӧн сӧмын бахаи котырын, асшод (свобода) медвылӧ пуктысь религияын. Сэтысь весиг эг петавлы, общинаыс ачыс киссис, разаліс, кор нырщикъяс мунісны мӧд карӧ.
"Фомичьяс" элясьӧны, журналсӧ оз пӧ вермыны унаӧн судзӧдны, оз тырмы налы. Со и артмӧ, кодлыкӧ оз тырмы, кодлы колӧ, а кодлы оз ков, зэв на бура тырмӧ. Кор помасяс тайӧ циркыс? Ог кӧ сувтӧд тайӧ машинасӧ, сійӧ ачыс тыдалӧ некор оз сувт. Ковмис реагируйтны, водзмӧстчыны.