СЩА-са президент Дональд Трамп анонсируйтіс РСМД договорысь петӧм йылысь мӧвп. Сылӧн советник Джон Болтон ветліс Москваӧ, кӧні аддзысьліс Россияса веськӧдлысьяскӧд.
Пансис вензьӧм. Унаӧн босьтчисны дивитны америкасаӧс йӧзӧдӧм воськовсьыс. Весиг ӧткымын демократъяс да либералъяс повзьӧдлӧны помшуӧмӧн, договорысь петӧмыс вайӧдас пӧ уна лёктор.
А ме чайта дзик мӧдарӧ. Договорас кольччӧмыс ваяс унджык лёктор. Колӧ ӧйӧджык киритны ДРСМД-мӧ. Вайӧда некымын аргумент.
Медся вына аргументыс татшӧм: эз кӧ эськӧ вӧв СССР да Гитлерлӧн Германия костын уськӧдчыны позьтӧм йылысь пактыс, то ӧдвакӧ сэки 22-ӧдся июньыс лоис, ӧдвакӧ эськӧ суис миянӧс 1941-ӧд во. Пактыс ылӧдліс СССР-ӧс да вайӧдіс ыджыд неминучаӧ.
Мӧд помка: РСМД кузя договорыс – збыль вылас абутӧмтор, вынсӧ воштӧм, кувсьӧм докумант, мода вылас олысь кабала. Доныс сӧмын сы мында, мыйта сулалӧ бумагаыс, код вылӧ гижӧма текстсӧ.
Коймӧд-кӧ, РСМД сёрнитчӧм вӧлі кырымалӧма 1987 воын Горбачевӧн да Рейганӧн. Сэксянь колис уна кад, уна ва визувтіс, вежсис олӧмыс вуж выйынӧдз. Непоштӧ ӧти, некымын историческӧй эпоха-кадколаст прӧйдитіс.
Нёльӧд-кӧ, тырвыйӧ сӧглас Джон Болтонкӧд, мый США-лӧн договорсьыс петӧмыс оз вӧч мирсӧ ӧпаснӧйджыкӧн. Сысь на унджык, ме лыддя, мирсӧ сійӧ вӧчас безопаснӧйджыкӧн. Ыджыд политикъяс кутасны асьсӧ кутны видзчысьӧмӧнджык. Международнӧй политика – векни йи вылын ветлӧдлӧм кодь жӧ. Кор договорыс эм, сэки позьӧ йи вылас йӧктыны, надеяӧн мый мездас.
Мый виччысьӧ мушарсӧ. оз кӧ пет США договорсьыс? Путинлӧн режим, коді збыль вылас важӧн нин оз пыдди пукты ДРСМД-лысь индӧдъяссӧ, век торкалӧ найӧс, водзӧ кутас вӧчавны выль ракетаяс да ядернӧй оружие, Калининградскӧй областьын меститіс «Искандеръяс», вермас уськӧдчыны Рытыввыв вылӧ либӧ вынӧн ышнясьӧмӧн тшӧктыны сетчыны. Тайӧ лоас мирӧвӧй историялӧн пом. Татшӧмтойӧдзыс вайӧдны оз позь.
Кӧні петан туйыс? Волӧ кырымавны выль сёрнитчӧм да водзӧ овны сы серти. А важсӧ шыбитны историялӧн ёг чукӧрӧ.