Турция паніс военнӧй операция Сирияса Африн юкӧнын курдъяслы паныд. Вӧчсьӧ зэв ыджыд преступление. Коді нинӧмӧн абу подулалӧма. Агрессорсӧ колӧ сувтӧдны.
Мыйын помкаыс тайӧ лёкторыслӧн. Мыжа абу сӧмын Турцияса президент Эрдоган, но нӧйта ыджыдджык мыж Россияса диктатор Путинлӧн. Коді сетіс турокъяслы турунвиж туйсӧ агрессия вылӧ. Вӧліны гуся сёрнитчӧмъяс Россияса, Турцияса да Иранса веськӧдлысьяс костын, код серти юкисны Сириясӧ ас костаныс, кыдз бандитъяс юклӧны добыча. «Тэ меным, ме – тэныд» подув серти.
Путинскӧй режим мыжа нӧшта ӧти преступлениеысь.
Агрессор водз ли сёр ворссяс. Вермас лоны мый ситуация воас сэтчӧдз, мый Эрдогансӧ асьныс турокъяс чӧвтасны власть бердысь. Путин сійӧс некымынысь ылӧдліс. Чайта и тайӧ пӧрйӧ коляс потӧм вор дорын.
Эрдоган – йӧй диктатор. Этшсӧ воштӧм да мера тӧдтӧм. Путин век бӧбйӧдліс сійӧс и тайӧ пӧрйӧ бара. Путинлӧн планыс – судтӧдны ӧта-мӧдыслы паныд НАТО-ӧс да Турцияӧс, люкӧдны найӧс. Нетшыштны Турциясӧ НАТО блоксьыс. А сэсся сюйсьыны Турциялӧн пытшкӧсса делӧясӧ, вӧчны тайӧ канансӧ сателлитӧн, а сэсся и артмас кӧ – оккупируйтны Сириясӧ моз. Россияса империалъяс век мечтайтісны Константинополь йылысь. Путин олӧ сэтшӧм жӧ мӧвпъясӧн.
Тайӧ агрессияыс отсалӧ путинскӧй режимлы паськӧдчыны геополитическӧй ногӧн. Позьӧ лэптыны Асадлысь котировкаяссӧ, а збыль вылас Россиялысь кыдз агрессивнӧй кананлысь.
Тайӧ путинскӧй Россиялӧн вермӧм, сійӧ кужис вӧрӧгяссӧ люкӧдны ӧта-мӧдыслы панад. Но вермӧмыс сӧмын тактическӧй, дженьыд кандколастса. А стратегическӧя – тайӧ ворссьӧм!