Мастысмысь президентскӧй бӧрйысьӧм лэптӧ нӧшта ӧти юалӧм: кымын процента вермӧм шедӧдас сійӧ, кодӧс ставыс мыйлакӧ водзвыв йӧзӧдісны вермысьӧн. Дерт, тайӧ оз ло вермӧмӧн, а вермӧмсӧ серпасалӧм. Сёрни, дерт, мунӧ Путин йылысь.
Кутшӧм помартмӧмӧ вайӧдасны разнӧй лыдпасъяскӧд йитчӧм ситуацияяс?
Ме чайта, властьыс сетас нацнырщиклы сы мында рейтинг, мыйта лоӧ оптимальнӧйԋ. Коланаысь абу этшаджык и абу весиг унджык. ӧтарӧ либӧ мӧдарӧ шыбелитчӧм – сетӧ кутшӧмсюрӧ рискъяс.
Первойя серпас: лоӧ кӧ вывті этша гӧлӧс Путин вӧсна. Мый сэки? Сэки тайӧ лоас аслыспӧлӧс сигнал водзсасыьысьяслы, мый вождьным жеб да слаб. Сэки уна йӧз вермасны петны улича вылӧ протестъяс вылӧ да код тӧдас кыдзи помасяс веныс. Вермасны и чӧвтны тиранӧс. Тайӧ ӧти пельӧсса ситуация. Шуам, 70 процентысь кӧ этшаджык лоӧ, сэки власть паныдасяс сьӧкыдлунъяскӧд, а лоӧ кӧ 60-ысь этшаджык воссяс ыджыд позянлун диктаторсӧ пуклӧссьыс чӧвтӧм вылӧ.
Мӧд шыбӧлитчанатор: вывті кӧ уна процент гижас аслыс Путин, шуам, 90 сайӧ процент. Тайӧ буртор сӧмын веркӧсас мӧвпыштӧмӧн, а збыльвылас сідзжӧ вайӧдас рискъясӧ, но сӧмын мӧдджыкъясӧ. Но ньӧти оз бурмӧд серпассӧ, а бӧръявыв нӧшта и лёкмӧдас. Вывті кӧ ыджыд ошкнана лыд лоас Путинлӧн, сэки йӧзыс кутасны сылысь виччысьны олӧм кокньӧдӧм, содасны сідз шксяна ожиданиеяс, кокньӧд виччысьӧмъяс. Тайӧ сьӧктӧдас системаяслысь уджсӧ, функционированиесӧ.
Нӧшта ӧти риск. Кор авторитарнӧй система дырйи кананӧн веськӧдлысь босьтіс бӧрйысигӧн уна процент (мед кӧть и унджыкыс – тайӧ фальсификация), сэки сылӧн юрыс кутас бергавны ыджыд вермӧмсьыс, воштас позянлун лючкиа мӧвпавны, сӧстӧм вежӧрӧн артавны политическӧй воськовъяссӧ. Став сьӧкыдлунъяссӧ, проблемаяссӧ кутас решайтны лючки воськовъясысь бокӧ кежӧмӧн. Медвойдӧр ортсыса политика вылӧ вештӧмӧн, военнӧй кось панны грӧзитчӧмӧн.