Кыдз тӧдса, водзмӧстчысь котыр вӧзйис Коми Республикаса юрканымӧс вуджӧдны Сыктывкарсянь Ухтаӧ?
Мыйла тайӧ вӧзйӧмыс, кутшӧм вылыс могыс? И кутшӧм видзӧдлас дор колӧ сулавны?
Ме чайта, оз ков сувтны ни «вӧсна», ни паныд. Оз ков тайӧ ковтӧм венас сюртчыны.
А тадзи вӧчӧны, медым ӧтдортны йӧзсӧ кыв гӧгӧр венысь. Юркар вежан серни – тайӧ аслыссикасас сайӧдан ру, тшын завеса. Медым вензисны, зыксисны, кӧні колӧ эськӧ пукавны правительстволы да Кансӧветлы да вунӧдісны медтӧдчана мог йылысь. Коми войтырлы на ӧтмунӧмлы ньӧти оз ков тайӧ.
Вӧзйӧны нуӧдны референдум. Мед нуӧдӧны, нинӧм лёкыс таын абу. «Коми войтыр» ӧтмунӧмлы оз ков тайӧ могнас занимайтчыны, оз позь сюртчыны ылӧдчана водзмӧстчӧмас. Тайӧ мулдеритӧм, медым ӧтдортны медсяысь медся тӧдчана – кан кыв доръян уджысь. Кора: энӧ веськалӧй налькъяс!
Кыв – тайӧ канаслӧн вужподув! Буретш та выло и колӧ медвойдӧр синсӧ чӧвтны Коми войтырлы. И этшаджык ноксьыны став мукӧд ковтӧм нокнас да проблемаяснас. Съездвывса резолюцияясас вывті уна внимание сетсьӧ туйяслы, быдсяма социальнӧй юкӧнъяслы. Збыль вылас тайӧ властьлысь индӧдъяс дублируйтӧм, мӧдпӧвсталӧм, сюрӧс бӧрся вӧтчӧм, инерция серти визувтӧм, кывтӧм. А корсюрӧ и популизмӧн ӧвтӧ. История петкӧдлӧ; сійӧ, коді сюртчӧ популизмӧ бӧръявыв век ворсьӧ, кольӧ потӧм вор дорӧ.