Зимбабвеын чӧвтісны «векся" президент Роберт Мугабеӧс, коді юрнуӧдіс республиканас 30 воысь дырджык, квайт срок. Квайтӧд срок вылас и вештісны-снимитісны коньӧрушкоӧс. Путинлӧн, кыдз ми тӧдам, витӧд (пятый) срок. Абу ёна ылын африкаса ёрт дорӧдзыс.
Путинлы – тайӧ аслыспӧлӧс ӧлӧдан пас, медым сійӧ тӧдіс да вежӧрас кутіс: векся власть оз вермы лоны. Мый водз ли сёр татшӧмыс суас и сійӧс. Сӧмын пом ногыс ВВП-лӧн лоас мӧдджык да шуштӧмджык. Роберт Мугабеӧс пуксьӧдісны гортса арест улӧ. Позьӧ шуны, кокниа повзьӧдӧм. А Путинӧс суас ёна чорыдджык помшуӧм. Вермас лоны, муас медбӧрья сарлӧн коктйуӧд, код тӧдас. Прӧстӧ сітанас чужйӧм – вӧлі эськӧ сылы медкокни помӧн. Но оз ло кокниа мынӧм. Россияын Зимбабвеысь ёна чорыдджык, централизуйтӧм политическӧй система. Сідзкӧ киссян процессъяс мунасны чорыда. Вир киссьӧмысь мездысьны позьтӧг.
Кывшутӧг, и уна мукӧд авторитарнӧй да тоталитарнӧй канаын мӧдпӧвстасяс Зимбабвелӧн пример. Вермас лоны, и Войвыв Кореяын.
Путин эз ӧтчыдысь шулы-крапнитлы, некӧні некутшӧм рӧма революция ог сет ыпнитны, кута водзсасьны. И збыльысь водзсасьӧ. И мый артмис? Мир пасьталаын дугдісны лоны-артмывлыны революцияяс. А сы пыдди петкӧдчӧны властьсӧ гуся кымыньтӧм-переворотъяс. Кодкӧ шуліс, вирыс кӧ оз визувт сӧнъясті, сідзкӧ визувтӧ капилляръясті. Кор йӧзсӧ топӧдӧны, оз сетны площадь-эрдъяс вылын водзмӧстчыны, серпасыс сӧвмӧ мӧд туйӧд – режимъяссӧ кымыньтан, переворот сюрӧсӧд.